കഴിഞ്ഞ മാസം കയത്തിലും കുളത്തിലുമായി ഒരുപാട് പേർ....
ഈ മാസം വഴിയിൽ ആകാനാണ് സാദ്ധ്യത. കരുതി ഇരിക്കുക.
പാലത്തിൽ ഓവർടേക്ക് ചെയ്തതിൽ തന്നെ ഇന്നലെ രണ്ടു പേർ!
ഇത് കേൾക്കുക.
ഇന്നലെ പത്തുമണിയോടെ ഞാൻ തിരുവനന്തപുരം പോയി. ഓർഡിനറി അഥവാ സാദാ ലോ ഫ്ളോർ ആണ് സാധാരണ യാത്ര. വേഗം എത്തണമെന്ന് കരുതി സൂപ്പർ ഫാസ്റ്റ് കിട്ടാൻ കാത്തുനിന്നു. ഭാഗ്യത്തിന് പുതിയ സ്വിഫ്റ്റ് വന്നു. ജനാല ചില്ലുകൾ ഒഴിച്ചാൽ ഏറ്റവും സുഖകരമായ യാത്ര നമുക്ക് പുതിയ സ്വിഫ്റ്റ് തരുന്നു. ഒരു പെൺകുട്ടിയുടെ അടുത്ത് ആണ് സീറ്റ് കിട്ടിയത്. അവൾ ശ്രീകാര്യത്ത് ഇറങ്ങി. വിൻഡോ സീറ്റ് അങ്ങനെ എനിക്ക്. ഇടത് വശത്തെ കഴിവതും ഇരിക്കൂ. ആറ്റിങ്ങലേക്ക് ഉച്ചയ്ക്ക് മുമ്പ് ആണെങ്കിൽ വലത് വശത്ത്. സൂര്യനെ പ്രതിരോധിച്ച് ആണ്.
തൊട്ടപ്പുറത്ത് സീറ്റിൽ വാതോരാതെ സംസാരിക്കുന്ന ഒരു മനുഷ്യന്റെ കഥകൾ ശ്രദ്ധിച്ച് പെട്ടെന്ന് തന്നെ പാളയം എത്തി. എനിക്ക് തമ്പാനൂർ ആണ് ഇറങ്ങേണ്ടത്. വണ്ടി ബേക്കറി സ്റ്റോപ് കഴിഞ്ഞ് മേൽപാലത്തിൽ കയറി. വന്ന അതേ വേഗതയിൽ ആണ് ഡ്രൈവർ. മുൻപിൽ മറ്റൊരു ആനവണ്ടി. ഡ്രൈവർ ഓവർടേക്ക് ചെയ്യുന്നത് കണ്ട് ഞാൻ അന്തം വിട്ടു നോക്കുകയാണ്. എതിരേ ഒരു ടെമ്പോ വാൻ വരുന്നു. തനി ആനവണ്ടി ശൈലിയിൽ തനിക്കെന്ത് എന്ന് ഡ്രൈവർ. വണ്ടികൾ ഒരേ വേഗത്തിൽ മുന്നോട്ട്. ഡ്രൈവർ ചവുട്ടി കേറ്റി. കഷ്ടകാലത്തിന് ടെമ്പോയും ഇങ്ങെത്തി. ഡ്രൈവർ വണ്ടി വെട്ടിച്ച് മറ്റേ ആനവണ്ടി യുടെ മുമ്പിലേക്ക്. ഞാൻ അന്തംവിട്ടു നോക്കുകയാണ്. എനിക്ക് മേൽപാലത്തിൻ്റെ കൈവരിയിലേക്ക് ബസ് ചെന്ന് കയറാൻ പോകുന്നത് കാണാൻ പറ്റി. ഞാൻ വലത്തേക്ക് മാറിയതും ഡ്രൈവർ വണ്ടി വലത്തേക്ക് പിന്നെയും വെട്ടിച്ചു. വേഗതയിൽ തിരിഞ്ഞത് കൊണ്ട് വാഹനത്തിന്റെ പിൻഭാഗം ഇടത്ത് ശക്തിയായി ഇടിച്ചത് കേട്ടു.
ഞാൻ എണീറ്റു നിൽക്കുന്നു. സത്യം പറഞ്ഞാൽ വിറച്ചു പോയി. വണ്ടി രണ്ടാമത് വെട്ടിക്കാൻ മനസാന്നിദ്ധ്യം ഡ്രൈവർക്ക് ഉണ്ടായതിന് ഈശ്വരൻ ആയിരിക്കും കാരണം! അല്ല എങ്കിൽ മേൽപാലത്തിൻ്റെ ഏറ്റവും മുകളിൽ നിന്ന് കൈവരിയിൽ ഇടിച്ച് വണ്ടി തകിടം മറിഞ്ഞ് താഴെ പതിക്കുന്നത് ഞാൻ നിമിഷാർദ്ധത്തിൻ്റെ ഏറ്റവും ചെറിയ ഞൊടിയിൽ തന്നെ മുമ്പിൽ കണ്ടിരുന്നു.
മറ്റേ ആനവണ്ടി പാലത്തിൽ നിർത്തി ഇട്ടു.
അൽപം മുന്നോട്ട് പോയി ശങ്കയിൽ ഞങ്ങളുടെ ബസും നിന്നു.
മറ്റേ ആനവണ്ടി യുടെ ഡ്രൈവർ വണ്ടി വലത്തേക്ക് കൊണ്ട് വന്ന് ഞങ്ങളുടെ ഡ്രൈവറെ ചീത്ത വിളിച്ചു.
ഞാൻ എണീറ്റു നിൽക്കുന്നു. യാത്രക്കാർക്ക് കാര്യം മനസ്സിലായി തന്നെ ഇല്ല. ചിലർ ഉറങ്ങുകയായിരുന്നു.
ഞാൻ കണ്ടക്ടറോട് ചോദിച്ചു, 'ഇങ്ങനെ ആണോ വണ്ടി ഓടിക്കുന്നത്?' ' മേൽപാലത്തിൽ വണ്ടി ഓവർടേക്ക് ചെയ്യാമോ?'
അയാളും നിൽക്കുക ആയിരുന്നതുകൊണ്ട് അയാൾ ടെമ്പോ വാൻ കണ്ടിരുന്നു.
'ആ ടെമ്പോ വാൻ കണ്ടോ! അയാളാണ് കാരണം.'
അൽപം നേരം ആലോചിച്ചു ഞാൻ പറഞ്ഞു. 'അതിന് ഇത് വൺവേ അല്ലല്ലോ!'
* * *
വാൽ കഷ്ണം:
ഇതേ സംഭവം തന്നെ ആണ് ഇന്നലെ മാർത്താണ്ഡത്തും നടന്നത്. തിരുവാങ്കുളം കാരനായ ഡ്രൈവർ അനീഷ് (43) മരിച്ചു പോയി.
വൈകിട്ട് ഞാൻ കയറിയ ചെറിയ സ്വിഫ്റ്റ് വണ്ടിക്കും മറ്റൊരു വാഹനത്താൽ ചെറിയ പ്രശ്നം ഉണ്ടായി.
ഞാൻ മാത്രമല്ല, എല്ലാവരും ഒന്ന് കരുതുന്നത് നല്ലതാണ്. ചൂട് രാവിലെ തന്നെ 33° ആയിരുന്നു.
